Henri Matisse

Dr Henri Matisse (* 31. Dezämber 1869 z Le Cateau-Cambrésis, Nord, Frankriich; † 3. Novämber 1954 z Cimiez, hüte e Vorort vo Nizza), vollständig Henri Émile Benoît Matisse, isch e französische Mooler, Grafiker, Zeichner und Bildhauer gsi. Er zehlt mit em Pablo Picasso zu de bedütendste Künstler vo dr Modärne. Näben em André Derain gältet er as dr Wägbereiter und Hauptverdräter vom Fauvismus, wo d Loslösig vom Impressionismus propagiert jet und e künstlerischi Revolution im 20. Jahrhundert gsi isch.^[1] Dr Matisse het si eigene künstlerische Stil dur d Aawändig vo dr reine Farb für e rüümligi Wirkig. In siine Gmälde si d Farbgäbig, dr spiilerisch Bildufbau und d Liichtigkeit vo siine Bildtheme s Resultat vo lange Studie.^[2] Mit siine Schereschnitt (gouaches découpées), wo in den 1940er Johr entstande si—e Bischbil isch s Künstlerbuech Jazz—het im Matisse siis Spootwärk siini Reduktionsbesträbigen abgschlosse und die ersehnti Synthese vo Linie und Farbe erfüllt.^[3] Dr Künstler sälber het d Rosechranzkapälle z Vence, won er blant und usgstattet het und wo im Johr 1951 iigweiht worden isch, für si Meisterwärk ghalte.^[4] Siini stilistische Neuerigen hai die modärni Kunst beiiflusst, so dr abstrakt Expressionismus in de USA.

1. ↑ Bucerius Kunst Forum: Matisse. Menschen, Masken, Modelle, Ausstellung in Hamburg, 2009
2. ↑ Lawrence Gowing: Matisse, Umschlagrückseite
3. ↑ Henri Matisse – Mit der Schere zeichnen. frankfurtlounge, 2002, abgruefen am 7. Mai 2009. 
4. ↑ Henri Matisse: Farbe und Gleichnis, S. 110